संतश्रेष्ठ ज्ञानेश्वर महाराज पालखीचे फलटणमध्ये भक्तिमय वातावरणात स्वागत

Sant Shrestha Dnyaneshwar Maharaj's palanquin welcomed in Phaltan in a devotional atmosphere

    फलटण (गंधवार्ता वृत्तसेवा) दि.१७ जुलै २०२६ - 

विठ्ठल जळ स्थळी भरला |

रीता ठाव नाही ऊरला ||

आजी म्या दृष्टीने पाहिला |

विठ्ठलाची विठ्ठल ||

    संतश्रेष्ठ ज्ञानेश्वर महाराज पालखी सोहळ्यात सहभागी झालेल्या लाखो वारकऱ्यांच्या उपस्थितीत टाळ, मृदंगाच्या गजरात, अभंगातूनी विठ्ठलावर प्रेमाचा वर्षाव करीत ज्ञानराज माऊली,  तिर्थक्षेत्र म्हणून सर्वत्र परिचीत असलेल्या फलटणच्या 'राम' नगरीत पोहचल्यावर ठीक ठिकाणी भक्तिमय वातावरणात पालखी सोहळ्याचे स्वागत व आशीर्वाद घेण्यात आले. पालखी सोहळा फलटण येथील विमानतळावर विसावल्यानंतर,सायंकाळी प्रशासनाच्यावतीने सोहळ्यातील मानकरी व विश्वस्तांचे शाल, श्रीफळ देवून स्वागत करण्यात आले. त्यानंतर समाज आरती होवून सोहळा एक दिवसाच्या मुक्कामासाठी फलटण येथे विसावला. उद्या शनिवारी सकाळी ६ वाजता पालखी सोहळा जिल्ह्यातील अखेरच्या मुक्कामासाठी बरड ता. फलटणकडे मार्गस्थ होईल.

    टाळ, मृदंगाचा गजर व हरिनामाचा जयघोष करीत सोहळा ऐतिहासिक अशा फलटणमध्ये आला. लाखो वारकऱ्यांच्या मुखातून ज्ञानोबा - तुकाराम, माऊली..... माऊली.... नामाचा अखंड जागर सुरू होता.  पालखी सोहळा शहराच्या वेशीवर  पोहोचला. तेथे नगराध्यक्ष समशेरसिंह नाईक निंबाळकर, उपनगराध्यक्ष सौ प्रियदर्शनी भोसले,फलटण प्रांताधिकारी प्रियांका अंबेकर, तहसीलदार डॉ.अभिजीत जाधव, फलटण नगर परिषदेत मुख्याधिकारी निखिल जाधव, नगरसेवक व  शहरवासियांनी माऊलींसह वैष्णवांचे स्वागत केले.

    संतश्रेष्ठ ज्ञानेश्वर महाराज यांच्या पालखीचे फलटण शहरात ५.०० वाजता आगमन झाले. पालखी सोहळा मलठण, सद्गुरु हरिबुवा महाराज मंदिर, पाचबत्ती चौक मार्गे सायंकाळी ६ वाजता श्रीराम मंदिराजवळ पोहोचला. अश्वांचे व माऊलींसह वैष्णवांचे इथे नाईक निंबाळकर देवस्थान ट्रस्टच्यावतीने जिल्हा परिषद माजी अध्यक्ष श्रीमंत संजीवराजे नाईक निंबाळकर व श्रीमंत शिवांजलीराजे नाईक निंबाळकर, पंचायत समितीचे माजी सभापती श्रीमंत विश्वजीतराजे नाईक निंबाळकर, नगरसेवक श्रीमंत अनिकेतराजे नाईक निंबाळकर यांनी पालखी सोहळ्याचे स्वागत व दर्शन घेतले. याप्रसंगी पृथ्वीराज राजेमाने, डॉ.पार्श्वनाथ गुंगा, ॲड महेंद्र नलवडे, ॲड अभिजित मोहिते,महादेवराव माने, अमोल सस्ते उपसभापती पप्पू भाई शेख (नगरसेवक) किशोरसिंह नाईक निंबाळकर (माजी नगरसेवक) अनंत भैय्या भोसले, तेजसिंह इंगळे, तुषार नाईक निंबाळकर, दशरथ यादव ,अजित पेटकर पुजारी, अभिजीत निंबाळकर, सुनील जंगम, गोरख पवार, संजय रुपनवर उपस्थित होते.

    दरम्यान फलटण शहरवासीयांनी ठिकठिकाणी माऊलींचे स्वागत केले व दर्शन घेतले. त्यानंतर सोहळा गजानन चौक, महात्मा फुले चौक, सफाई कामगार कॉलनी या मार्गाने विमानतळावरील प्रशस्त पालखी तळावर विसावला.