फलटण येथे डॉ. बाबासाहेब आंबेडकर यांची १३५ वी जयंती जल्लोषात
फलटण (गंधवार्ता वृत्तसेवा) दि.१५ - भारतरत्न डॉ. बाबासाहेब आंबेडकर यांची १३५ वी जयंती मोठ्या उत्साहात व जल्लोषात संपन्न झाली. डॉ. बाबासाहेब आंबेडकर जयंती महोत्सव समिती २०२६ ने विविध कार्यक्रम आणि उपक्रमांचे आयोजन केले होते. सायंकाळी डॉ. बाबासाहेब आंबेडकर यांच्या प्रतिमांची व विचारांची भव्य शोभा यात्रा काढण्यात आली होती. शोभा यात्रेत विविध चित्ररथामध्ये डॉ. बाबासाहेब आंबेडकर, गौतम बुद्ध यांच्या आकर्षक प्रतीकृती व देखावे केल्यामुळे नागरिकांनी मिरवणूक पाहण्यासाठी गर्दी केली होती. शोभायात्रेचा शुभारंभ विधान परिषदेचे माजी सभापती व विद्यमान आमदार श्रीमंत रामराजे नाईक निंबाळकर व आमदार सचिन पाटील, फलटण नगर परिषदेचे नगराध्यक्ष समशेरसिंह नाईक निंबाळकर यांच्या हस्ते करण्यात आले.
सोमवार दि. १३ रोजी रात्री १२ वाजता बौद्ध बांधवांनी डॉ.बाबासाहेब आंबेडकर चौक येथे भारतरत्न डॉ.बाबासाहेब आंबेडकर यांच्या पुतळ्यास पुष्पहार अर्पण करून अभिवादन केले. त्यांनतर त्रिसरण पंचशील ग्रहण करून, रात्री १२ वाजता आंबेडकरी नूतन वर्षाचे फटाक्यांच्या आतषबाजीत स्वागत करण्यात आले. याप्रसंगी उपस्थितांनी डॉ. बाबासाहेब आंबेडकर यांचे कार्य व विचार याबाबत मनोगते व्यक्त केली.
मंगळवार दि. १४ रोजी सकाळी ८ वाजता वीर जिवा महाले चौक, फलटण येथे भिमज्योतीचे स्वागत तहसीलदार डॉ अभिजित जाधव व पोलीस निरीक्षक अरविंद काळे यांनी केले, यावेळी डॉ.बाबासाहेब आंबेडकर जयंती महोत्सव समिती पदाधिकारी, कार्यकर्ते, मान्यवर उपस्थित होते. त्यानंतर शहरातील प्रमुख मार्गावरून भीमज्योत नेत असताना ठिकठिकाणी भीमज्योतीचे स्वागत करण्यात आले. भीम ज्योतीचे आगमन डॉ. बाबासाहेब आंबेडकर चौक येथे झाल्यानंतर तेथे आमदार सचिन पाटील व इतर मान्यवरांनी ज्योतीचे स्वागत केले.
भारतरत्न डॉ.बाबासाहेब आंबेडकर जयंती निमित्ताने आमदार सचिन पाटील, मा. आमदार दिपकराव चव्हाण, महाराष्ट्र खो - खो असोसिएशनचे अध्यक्ष श्रीमंत संजीवराजे नाईक निंबाळकर, नगराध्यक्ष समशेरसिंह नाईक निंबाळकर, पंचायत समितीचे सभापती श्रीमंत शिवांजली भोसले तसेच अनेक मान्यवर व विविध सामाजिक संघटनांनी व डॉ. बाबासाहेब आंबेडकर यांच्या पुतळ्यास पुष्पहार घालुन अभिवादन केले. फलटण शहर व तालुक्यातील विविध सहकारी संस्था, स्थानिक स्वराज्य संस्था, शाळा, महाविद्यालये, सामाजिक संस्था वगैरे ठिकाणी डॉ. बाबासाहेब आंबेडकर यांच्या प्रतिमांना पुष्पहार घालुन अभिवादन केले.
पंचशील रिक्षा ऑटो संघटनेच्या वतीने विठ्ठल मंदिर येठे अन्नदानाचा कार्यक्रम संपन्न झाला. भीम नगर, मंगळवार पेठ फलटण येथील मित्र मंडळानेही अन्नदान व अभिवादन कार्यक्रमाच्या आयोजन केले होते. सोमवार पेठ फलटण, येथेही डॉ. बाबासाहेब आंबेडकर जयंती उत्सवा निमित्त कार्यक्रमाचे आयोजन करण्यात आले होते. महाराष्ट्र राज्य मार्ग परिवहन महामंडळ (एस. टी.) फलटण आगार व कामगार संघटना तसेच डॉ. बाबासाहेब आंबेडकर रिक्षा ऑटो संघटनेच्यावतीने बसस्थानकावर मान्यवरांचे हस्ते डॉ. बाबासाहेब आंबेडकर यांच्या प्रतिमेस पुष्पहार घालुन अभिवादन करण्यात आले.
मंगळवार दि. १४ रोजी रात्री ८ वाजता पंचशील चौक, मंगळवार पेठ येथून भारतरत्न डॉ. बाबासाहेब आंबेडकर व तथागत गौतम बुद्ध यांच्या प्रतिमा व चित्ररथासह शहर व तालुक्यातील ग्रामस्थांच्या सहभागाने आकर्षक विद्युत रोषणाई व सजावटीत प्रचंड मिरवणूक काढण्यात आली. याप्रसंगी मिरवणूकीचा शुभारंभ विधान परिषदेचे माजी सभापती श्रीमंत रामराजे नाईक निंबाळकर व आमदार सचिन पाटील, फलटण नगर परिषदेचे नगराध्यक्ष समशेरसिंह नाईक निंबाळकर यांच्या हस्ते करण्यात आले. याप्रसंगी डॉ.बाबासाहेब आंबेडकर जयंती महोत्सव समितीचे पदाधिकारी व प्रल्हादराव साळुंखे पाटील, युवा नेते अभिजीत भैय्या नाईक निंबाळकर, महाराजा मल्टीस्टेटचे व्हा. चेअरमन रणजीतसिंह भोसले माजी नगरसेवक अशोकराव जाधव, सनी अहिवळे, सुधीर अहिवळे, नगरसेविका सौ.सुपर्णा अहिवळे, सौ मीना काकडे, विकास काकडे, सचिन अहिवळे, व इतर मान्यवर मोठ्या संख्येने उपस्थित होते.
शोभायात्रा संपल्यानंतर भारतरत्न डॉ. बाबासाहेब आंबेडकर जयंती महोत्सव समितीच्यावतीने पोलीस प्रशासन, ट्रक्टर चालक, झांजपथक, लाईट डेकोरेशन, साउंड सिस्टिम व जयंती महोत्सवास ज्यांची मदत झाली त्यासर्वांचे पुष्पगुच्छ देवून आभार मानण्यात आले. यावेळी पोलीस यांच्यासह विविध संस्थाचे पदाधिकारी, जयंती महोत्सव समितीचे पदाधिकारी व समाज बांधव उपस्थित होते.
.jpg)
.jpg)
No comments