फलटण शहरात ५०० ऑक्सिजन बेड्स दानशूर व्यक्तींच्या मदतीतून उभे करणार
कोव्हिड रुग्णांच्या मदतीसाठी दानशूर व्यक्तींनी सढळ हाताने मदत करावी
- मुख्याधिकारी प्रसाद काटकर
फलटण (प्रतिनिधी) - कोव्हिड-१९ या आजाराचा फैलाव खूप झपाट्याने होत असून दिवसेंदिवस रुग्णांची संख्या मोठ्या प्रमाणामध्ये वाढत आहे. मात्र त्या प्रमाणामध्ये रुग्णांना बेड उपलब्ध होत नाहीत व काही रुग्णांना जर ऑक्सिजन देण्याची गरज भासली तर तेवढे ऑक्सिजनचे बेड आपल्या फलटणमध्ये उपलब्ध नाहीत. त्यामुळे रुग्णांना ऑक्सीजनचा बेड उपलब्ध न झाल्यामुळे रुग्णांंचा जीव धोक्यात येत आहे. भविष्यात रुग्णांची संख्या वाढण्याची शक्‍यता गृहीत धरून फलटण शहरामध्ये ५०० ऑक्सिजनयुक्त बेड्स उपलब्ध करण्याचा प्रयत्न चालू असल्याचे प्रतिपादन फलटण नगर परिषदेचे मुख्याधिकारी प्रसाद काटकर यांनी प्रसिद्धीस दिलेल्या पत्रकामध्ये नमूद केले आहे.
पत्रकात पुढे प्रसाद काटकर म्हणतात की फलटण शहरातील मोठे उद्योगपती, बिल्डर, व्यापारी व सदन व्यक्तींनी सदरचे ऑक्सिजनयुक्त बेड मिळविणे कामी सढळ हाताने मदत करण्याचे आवाहन फलटण नगर परिषदेचे मुख्याधिकारी प्रसाद काटकर यांनी केले आहे. आपल्या या मदतीमुळे अनेक कोरोनाग्रस्त रुग्णांचे प्राण वाचणार असून या ऑक्सिजन मुळे त्यांना जीवनदान मिळणार आहे. व आपली मदत कामाला ही येणार असल्याचे पत्रकात प्रसाद काटकर यांनी म्हटले आहे.
No comments