फलटण नगरपरिषदेची निवडणूक लांबणीवर; उमेदवारांवर संकट की संधी?
फलटण (गंधवार्ता वृत्तसेवा) दि.३० नोव्हेंबर२०२५ - फलटण नगरपरिषदेची सार्वत्रिक निवडणूक काही तांत्रिक कारणांमुळे लांबणीवर पडली असून, या निर्णयाचा उमेदवारांवर ‘संकट की संधी’ असा दुहेरी परिणाम दिसून येत आहे. काही उमेदवारांसाठी ही चूक दुरुस्त करण्याची आणि नवी रणनीती आखण्याची संधी असताना, काहींना मात्र आतापर्यंत जुळवून आणलेले 'बेरजेचे राजकारण' फिस्कटण्याची भीती सतावू लागली आहे.
प्रचारासाठी मोठ्या प्रमाणात खर्च केलेल्या अनेक उमेदवारांना आर्थिक ताणाचा सामना करावा लागत आहे. निवडणूक जाहीर झाल्यापासून विविध प्रचारयंत्रणा उभारून 26 नोव्हेंबरपासून जोरदार प्रचार सुरू करण्यात आला होता. मतदानाला अवघे दोन दिवस उरले असताना आणि निकाल जवळ येत असतानाच निवडणूक पुढे ढकलल्याने उमेदवारांचा लाखो रुपयांचा खर्च वाया गेल्याची भावना व्यक्त होत आहे.
फलटण नगरपरिषदेच्या या निवडणुकीत एकूण 78 उमेदवार नगराध्यक्ष आणि नगरसेवक पदांसाठी रिंगणात आहेत. निवडणूक लांबणीवर गेल्याने आता अनेकांना पुन्हा नव्याने रणनीती आखावी लागणार आहे.
निवडणूक पुढे ढकलल्यानंतर आता उमेदवारांसमोर नवीन आव्हाने आणि नव्या संधी उभ्या राहिल्या आहेत. आगामी तीन आठवड्यांत कोण आपली रणनीती बदलतो, कोण आपला गडी टिकवतो आणि कोणाचे गणित बिघडते, हे पाहणे उत्सुकतेचा विषय ठरणार आहे.
महाराष्ट्र राज्य निवडणूक आयोगाने 29 नोव्हेंबर 2025 रोजी अपील प्रकरणांमुळे बाधित झालेल्या नगरपरिषद व नगरपंचायतींसाठी सुधारित कार्यक्रम जाहीर केला आहे.
ज्या नागरपालिकांमध्ये दाखल केलेल्या अपीलांचा निकाल 22 नोव्हेंबर 2025 नंतर-म्हणजे 23 नोव्हेंबर किंवा त्यानंतर-जिल्हा न्यायालयाकडून देण्यात आला आहे, त्या जागांसाठी पूर्वीचा 4 नोव्हेंबरचा कार्यक्रम लागू राहणार नाही. तसेच, अपील प्रकरणात अध्यक्ष पदाचा समावेश असल्यास संपूर्ण नगरपरिषदेची निवडणूकच स्थगित करण्यात आली आहे, असेही आयोगाने स्पष्ट केले आहे.
सुधारित निवडणूक कार्यक्रम
📌 निवडणूक कार्यक्रम जाहीर - 4 डिसेंबर 2025
📌 नामनिर्देशन मागे घेण्याची अंतिम मुदत - 10 डिसेंबर 2025 (दुपारी 3.00 वाजेपर्यंत)
📌 चिन्ह वाटप व अंतिम उमेदवारांची यादी - 11 डिसेंबर 2025
📌 मतदान - 20 डिसेंबर 2025 (सकाळी 7.30 ते सायंकाळी 5.00)
📌 मतमोजणी व निकाल - 21 डिसेंबर 2025
.jpeg)
No comments