पुणे पदवीधर मतदारसंघात महाविकास आघाडीचे अरुण लाड विजयी

    गंधवार्ता वृत्तसेवा (दि. 4 डिसेंबर) - पुणे पदवीधर मतदारसंघात महाविकास आघाडीने विजय मिळवला आहे. निवडणुकीत राष्ट्रवादी काँग्रेसचे अरुण लाड यांनी बाजी मारून विजयाचा गुलाल उधळला आहे. अरुण लाड यांनी भाजपच्या संग्रामसिंह देशमुख यांचा 48 हजार 824 मतांची आघाडी मिळवत विजय मिळवला. विजयासाठी 1 लाख 14 हजार 137 मतांचा कोटा पूर्ण करणे आवश्यक होते. अरुण लाड यांना तब्बल 1 लाख 22 हजार 145 मते मिळाली, तर भाजप उमेदवार संग्रामसिंह देशमुख यांना 73 हजार 321 मते मिळाली.

    अरुण लाड मतमोजणी सुरु झाल्यापासून आघाडीवर होते. अंतिम निकाल येण्यापूर्वीच अरुण लाड यांच्या कार्यकर्त्यांनी गुलालाची उधळण करत जोरदार घोषणाबाजी सुरु केली होती. दुसऱ्या फेरीतील मतमोजणीनंतर लाड यांचा विजय निश्चित मानला जात होता. आता अंतिम निकाल समोर आले आहेत. अरुण लाड यांच्या विजयाची घोषणा होताच कार्यकर्त्यांनी जल्लोष सुरु केला आहे.