फलटण येथे पाडव्याला होळी पेटवून शिमगा आंदोलन

        फलटण (गंधवार्ता वृत्तसेवा) दि. 14 नोव्हेंबर -  श्रीराम सह.साखर कारखाना लि.फलटण व नीरा व्हेली अर्कशाळा या दोन्ही संस्थेतून निवृत्त कर्मचारी गॅच्युइटीची रक्कम व थकीत पगार आणि रजेचा कामगारांना पगार मिळावा याकरता फलटण कृती समितीचे अध्यक्ष ॲड. नरसिंह निकम यांच्या नेतृत्वाखाली १५० कामगारांना घेऊन साखळी उपोषण चालू असून आज सात दिवस झाले तरी कारखाना प्रशासनाने कुठलीही दखल घेतलेली नाही, याच्या निषेधार्थ दिवाळी पाडव्याला म्हणजे उद्या दिनांक १६ नोव्हेंबर २०२० रोजी सकाळी 10 वाजता, सर्व कामगारांना घेऊन,  उपोषण स्थळावर होळी पेटवून श्रीराम कारखाना व्यवस्थापनांच्या नावाने बोंब मारून, शिमगा आंदोलन करणार असल्याचे ॲड.निकम यांनी जाहीर केले आहे.

         श्रीराम सहकारी साखर कारखाना लि.फलटण व नीरा व्हॅली अर्कशाळा या दोन्ही संस्थेतून सन २०१७ ते २०२० या सालात एकूण ६० कामगार सेवानिवृत्त झाले आहेत. या कामगारांची कारखान्याकडे व अर्कशाळेकडे सर्वाची मिळून अडीच ते तीन कोटी रुपये गॅच्युईटीची रक्कम थकीत आहे. त्याचप्रमाणे थकीत पगार व रजेचा पगार अशी येणे रक्कम आहे. वास्तविक पेमेंट ऑफ गॅच्युइटी अॅक्ट या कायद्यातील तरतुदीनुसार कामगार सेवानिवृत्त झाल्यानंतर पंधरा दिवसाचे आत संबंधीत संस्थेने गॅच्युइटीची रक्कम कामगारांना देणे बंधनकारक आहे. परंतु गेली तीन वर्ष कामगारांनी अनेकवेळा हेलपाटे मारुन सुध्दा कारखान्याने त्यांची ग्रॅच्युइटीची रक्कम अद्याप दिली नाही. त्यामुळे हक्काचे पैसे मिळण्यासाठी कामगारांनी फलटण तहसिल कार्यालयाच्या प्रवेशद्वारावर आंदोलनास सुरुवात केली असल्याचे ॲड. नरसिंह निकम यांनी कळवले आहे.