बिग बी कोरोना निगेटिव्ह

            मुंबई- बॉलिवूडचे महानायक अमिताभ बच्चन यांची करोना टेस्ट निगेटिव्ह आली असून त्यांना घरी पाठवण्यात आले आहे. गेल्या काही दिवसांपासून त्यांचे नानावटी इस्पितळात करोना व्हायरसवर उपचार सुरू होते. जवळपास २३ दिवसांनी ते आपल्या घरी जाणार आहेत. ७७ वर्षीय बिग बी यांनी सोशल मीडियावरून त्यांना आणि त्यांचा मुलगा आणि अभिनेता अभिषेक बच्चन याला करोनाची लागण झाल्याचे सांगितले होते. दोघांनाही तातडीने इस्पितळात भरती करण्यात आले होते.

            आता अभिषेक बच्चनने यासंबंधी ट्वीट करत वडिलांना इस्पितळातून घरी सोडण्यात आल्याचे सांगितले आहे. अभिषेकने ट्वीट करत म्हटलं की, ‘माझ्या बाबांची करोनाची टेस्ट निगेटिव्ह आली आहे. तुम्हा सर्वांच्या प्रार्थनांचे आणि शुभेच्छांचे मनापासून आभार.’ दरम्यान, अभिषेकचा करोना रिपोर्ट अजूनही पॉझिटिव्ह असल्यामुळे तो पुढील काही दिवस इस्पितळातच राहणार आहे.