केंद्रीय गृहमंत्री अमित शहा यांना करोना

            नवी दिल्ली:- केंद्रीय गृहमंत्री अमित शहा यांना करोनाची लागण झाली आहे. त्यानंतर डॉक्टरांच्या सल्ल्यानुसार त्यांना तातडीने रुग्णालयात दाखल करण्यात आले आहे. गृहमंत्री अमित शहा यांनी स्वत: ट्विट करत ही माहिती दिली आहे. करोनाचे सुरुवातीची लक्षणे दिसल्यानंतर मी चाचणी केली. त्यानंतर माझा रिपोर्ट पॉझिटीव्ह आल्याचे शहा यानी म्हटले आहे. माझी तब्येत ठीक असून डॉक्टरांच्या सल्ल्यानुसार मी रुग्णालयात दाखल होत असल्याचे त्यांनी स्पष्ट केले आहे. शहा यांना गुरुग्रामच्या मेदांता रुग्णालयात दाखल करण्यात आले आहे.

            अमित शाह यांनी ट्विटमध्ये दिलेल्या माहितीनुसार, “करोनाची प्राथमिक लक्षणं दिसत असल्याने आपण चाचणी केली असता रिपोर्ट पॉझिटिव्ह आला आहे. माझी प्रकृती ठीक आहे, पण डॉक्टरांनी दिलेल्या सल्ल्यानुसार आपण रुग्णालयात दाखल होत आहोत. माझी विनंती आहे की, गेल्या काही दिवसांमध्ये जे लोक माझ्या संपर्कात आले आहेत त्यांनी स्वत:चं विलगीकरण करावं आणि आपली चाचणी करुन घ्यावी”.

             करोनाने देशभरात थैमान घातलेलं असतानाच अनेक राजकीय नेत्यांनाही करोनाची लागण झाली आहे. काही लोकप्रतिनिधींना करोनामुळे आपला जीवही गमवावा लागला आहे. करोनावर नियंत्रण मिळवण्यासाठी अद्यापही प्रयत्न सुरु असून लॉकडाउनही ३१ ऑगस्टपर्यंत वाढवण्यात आला आहे. दरम्यान अमित शाह यांच्यासारख्या वरिष्ठ नेत्याला करोनाची लागण झाल्याने चिंता वाढली आहे.