दाम्पत्याने केली दीड कोटींची फसवणूक; गुन्हा दाखल
फलटण (गंधवार्ता वृत्तसेवा) दि.१८ ऑगस्ट २०२५ - फलटण तालुक्यातील मौजे निरगुडी येथील विकास बबन सस्ते व त्यांची पत्नी मनिषा विकास सस्ते या दाम्पत्याने फेब्रुवारी २०२२ पासुन वेळोवेळी शेअर मार्केट व डाळिंब खरेदी-विक्री व्यवसायात गुंतवणुकीवर मोठा परतावा देण्याचे आमिष दाखवून तब्बल १ कोटी ४४ लाख २१ हजार ६५० रुपयांची फसवणूक केल्याप्रकरणी फलटण शहर पोलीस ठाण्यात गुन्हा दाखल करण्यात आला आहे.
याबाबत तक्रारदार कृष्णात वसंत जाधव (रा. आसु, ता. फलटण) यांनी दिलेल्या फिर्यादीनुसार, कौटुंबिक जिव्हाळ्याचा फायदा घेऊन सस्ते दाम्पत्याने नोटरी करारनामे, प्लॉट हस्तांतरण व गुंतवणुकीवर दरमहा ४ ते १५ टक्के परतावा देण्याचे आमिष दाखवले. सुरुवातीला काही रक्कम परत दिल्यानंतर उर्वरित पैसे देण्यास टोलवाटोलवी करून अखेरीस फसवणूक केल्याचे स्पष्ट झाले.
सदर प्रकरणात केवळ तक्रारदारच नव्हे तर गणेश जगदाळे, दीपक जगदाळे, संदिप टोणगे, दयानंद वाघमोडे, सचिन तारे व धिरज जाधव आदी अनेक व्यक्तींना वेळोवेळी लाखो रुपयांचा गंडा घालण्यात आल्याचे तपासात समोर आले आहे.एकूण सहा तक्रारदारांना मिळून सस्ते दाम्पत्याने १ कोटी ४४ लाखांहून अधिक रकमेची आर्थिक फसवणूक केली आहे.
या प्रकरणाचा तपास सहाय्यक पोलीस निरीक्षक नितीन नम करीत असून, त्यांनी आवाहन केले आहे की,
"विकास बबन सस्ते यांनी अशाप्रकारे आणखी कोणाची फसवणूक केली असल्यास संबंधितांनी तात्काळ पोलिसांशी संपर्क साधावा."
No comments