फलटण येथे कुंटणखाना चालवणारा इसम ताब्यात ; ऑरेंज लॉज वर कारवाई

Man running a brothel in Phaltan arrested; action taken against Orange Lodge

    सातारा (गंधवार्ता वृत्तसेवा) दि.२४ जुलै २०२५ - फलटण येथील ऑरेंज लॉजवर बेकायदेशीर चालणाऱ्या कुंटण खाण्याच्या संदर्भाने स्थानिक गुन्हे शाखेने कारवाई करत लॉज मालकाला अटक केली आहे. प्रवीण रंगराव पवार राहणार विडणी तालुका फलटण असे संबंधित इसमाचे नाव आहे. या कारवाई मध्ये तीन पीडित मुलींची सुटका करण्यात आली आहे. या इसमाच्या विरोधात फलटण शहर पोलीस ठाण्यामध्ये गुन्ह्याची नोंद करण्यात आली आहे.

    स्थानिक गुन्हे शाखेचे पोलीस निरीक्षक अरुण देवकर यांना त्यांच्या बातमीदारामार्फत जाधववाडी तालुका फलटण गावच्या हद्दीत ऑरेंज लॉज येथे संशयित पवार याने वेश्यागमना करता मुली ठेवल्या आहेत, तो मागणीप्रमाणे त्या ठिकाणी पुरुष ग्राहकांना मुली पुरवतो, अशी खात्रीशीर माहिती मिळाली. त्यानुसारच स्थानिक गुन्हे शाखेचे सहाय्यक पोलीस निरीक्षक रोहित फाळणी, नितीन माने, महिला पोलीस उपनिरीक्षक श्वेता पाटील, विजयमाला गाजरे, पोलीस अमलदार रामचंद्र गुरव यांच्या पथकाने ऑरेंज लॉज येथे छापा मारून पवार यांना तात्काळ ताब्यात घेतले. या कारवाईमध्ये तीन पीडित महिलांची तात्काळ सुटका करण्यात आली. संबंधित इसमांच्या विरोधात मानवी अनैतिक व्यापार प्रतिबंध कायदा 1956 कलम चार व पाच नुसार गुन्हा नोंद करण्यात आला आहे.

    या कारवाईमध्ये पोलिस अमलदार रामचंद्र गुरव, आतिश घाडगे, संजय शिर्के, विजय कांबळे, शरद बेबले, प्रवीण फडतरे, मुनीर मुल्ला, रविराज वर्णेकर, शिवाजी गुरव, अमृत कर्पे,  क्रांती निकम, फलटण पोलीस ठाण्याचे राणी फाळके यांनी कारवाईत भाग घेतला होता, या कारवाईबद्दल पोलीस अधीक्षक तुषार दोशी यांनी स्थानिक गुन्हे शाखेचे अभिनंदन केले आहे.