तरडगाव यात्रेत दोन गटात मारहाण ; २२ जणांना अटक
फलटण (गंधवार्ता वृतसेवा) दि.३ मे - फलटण तालुक्यातील तरडगाव येथे सौ. वेणूताई चव्हाण हायस्कूलच्या मैदानात श्री भैरवनाथ जोगेश्वरी देवाच्या यात्रेनिमित महाराष्ट्राची गौरवगाथा कार्यक्रम सुरू असताना, नाचण्याच्या कारणावरून दोन समाजातील गटात झालेल्या मारामारी झाल्याची घटना घडली, या मारामारी प्रकरणी लोणंद पोलिस स्थानकात परस्परविरोधी तक्रारी दाखल करण्यात आल्या असून, दोन्ही बाजूच्या सुमारे २३ जणांच्या विरोधात गुन्हा दाखल करण्यात आला आहे तर दोन्ही बाजूकडील २२ जणांना लोणंद पोलिसांनी अटक केली आहे.
पहिल्या फिर्यादीत संतोष गायकवाड यांनी म्हटले आहे, की तरडगाव, ता. फलटणच्या भैरवनाथ जोगेश्वरी देवाच्या यात्रेनिमित्त गावातील महिलांकरता महाराष्ट्राची गौरवगाथा कार्यक्रम सुरु असताना प्रतीक उर्फ भैय्याकुमार गायकवाड, रा. तरडगाव, ता. फलटण हा दारू पिऊन नाचत होता, म्हणून मी व यात्रा कमिटी सदस्य प्रदीप गायकवाड, दीपक गायकवाड, संतोष कुंभार यांनी नाचू नको, शांत बसून कार्यक्रम बघ असे सांगितले. त्यावेळी त्याने ऐकले नाही. त्याला बाजूला नेल्याच्या कारणावरून चिडून प्रतीक गायकवाड, सुमेध संदीप गायकवाड, बादल दिनेश गायकवाड, सुहास जनार्दन गायकवाड, अजय आनंदा ननावरे, अमित आनंदा ननावरे, आयुष बनसोडे व इतर १५ ते २० जणांनी मला पाठीमागून मारहाण करण्यास सुरुवात केली. माझ्या डोक्यात दगड मारला. दगड लागून जखम होऊन रक्त आले म्हणून वरील ७ व इतर १५ ते २० जणांच्या विरोधात माझी तक्रार असल्याचे फिर्यादीत म्हटले आहे.
तर दुसऱ्या फिर्यादीत करुणा दिनेश गायकवाड, रा. तरडगाव यांनी म्हटले आहे की, भैरवनाथ देवाची यात्रा असल्यामुळे ठेवण्यात आलेला ऑर्केस्ट्रा बघण्यासाठी त्या गेल्या होत्या. त्यांचा मुलगा बादल गायकवाड हा उभा राहून नाचू लागला म्हणून ऑर्केस्ट्रा पाहण्याकरिता आलेल्या १६ जणांनी त्यांच्या मुलाला मारहाण केली. फिर्यादी भांडणे मिटवण्यासाठी गेल्या असता, त्यांना देखील दोन चापटी मारण्यात आल्या व त्यांच्या गळ्यातील सोन्याचे मंगळसूत्र तुटून कोठेतरी गहाळ झाले. त्यांच्या जातीतील इतर बायका सोडविण्यासाठी आल्या असता त्यांना देखील मारहाण करण्यात आली व तुमच्या जातीतील बायकांना इथे बसू द्यायचे नाही, तसेच जातिवाचक शिवीगाळ करून दमदाटी केली म्हणून ओंकार सोपान गायकवाड, आदित्य शंकर गायकवाड, अक्षय दत्तात्रय गायकवाड, संतोष वसंत गायकवाड, प्रदीप शिवाजी गायकवाड, मयूर शिवाजी गायकवाड, यश संतोष गायकवाड, अक्षय हिवरकर, राहुल विजय गायकवाड, सुदाम रामदास गायकवाड, तुकाराम नवनाथ गायकवाड, सौरभ महेंद्र गायकवाड, धीरज शरदगायकवाड, महेश नवनाथ गायकवाड, रणजित यशवंत गायकवाड, सागर वसंत गायकवाड व इतर ८ ते १० जणांच्या विरोधात तक्रार दिली आहे.
लोणंद पोलिसांनी या मारामारी प्रकरणी एका गटातील १५ जणांना व दुसऱ्या गटातील ७ जणांना अटक केली आहे. पोलीस उपनिरीक्षक विशाल कदम पुढील तपास करत आहेत.
No comments