सरकारी नोकरी लावतो म्हणून ६ जणांची फसवणूक ; २८ लाख रुपयांना गंडा

Fraud of Rs. 28 lakhs at Sakharwadi

    फलटण (गंधवार्ता वृत्तसेवा) दि.९ -  उपशिक्षण अधिकारी व पोलीस खात्यात भरती करतो असे सांगून, बनावट दस्तऐवज तयार करून  साखरवाडी परिसरातील दोन  महिलांसह चार युवकांची २८ लाख रुपयांची फसवणूक केल्याप्रकरणी पाटस ता. दौंड येथील ज्ञानेश्वर किसन चिरमे याच्या विरोधात फलटण ग्रामीण पोलीस स्टेशनला फसवणुकीचा गुन्हा नोंद करण्यात आला आहे.

    फलटण ग्रामीण पोलीस स्टेशन कडून मिळालेल्या माहितीनुसार, मौजे साखरवाडी तालुका फलटण गावच्या हद्दीत  शंकर किसन बोंद्रे वय ५१ वर्षे व्यवसाय शेती रा. खामगाव  ता. फलटण यांच्या सुनबाई यांना उपशिक्षणाधिकारी  पदावर नोकरी लावतो असे सांगून ज्ञानेश्वर चिरमे यांनी, जून २०१९ पासून वेळोवेळी ६ लाख ५० हजार रुपये घेतले, तसेच बोन्द्रे यांची सून शिक्षण विभागाची परीक्षा पास झाल्या बाबत बनावट पत्र ईमेलवर पाठवले, तसेच फिर्यादी  बोन्द्रे यांचा  मुलगा सौरभ व ओंकार यास पोलीस खात्यामध्ये भरती करण्यासाठी चिरमे याने ९ लाख रुपये घेतले आहेत. तसेच फिर्यादी बोन्द्रे यांच्या ओळखीचे महादेव ढवळे यांची पुतणी हीस पोलीस खात्यामध्ये भरती करण्यासाठी  १ लाख ८० हजार बँक खात्यातून व १ लाख २० हजार रुपये रोख रक्कम ज्ञानेश्वर चिरमे यांना दिले आहेत. तसेच जगन्नाथ गायकवाड यांनी त्यांचा मुलगा अनिकेत यास पोलीस खात्यात भरती करण्यासाठी चिरमे यास ४ लाख ५० हजार रुपये रोख दिले व ५० हजार रुपये बँक  खात्यावर पाठवले. तसेच चैतन्य हिंदुराव घाडगे याला देखील पोलीस खात्यामध्ये भरती करतो असे सांगून ४ लाख ५० रुपये त्याचे कडून घेतले आहेत.  ज्ञानेश्वर चिरमे याने वरील सर्वांना सरकारी नोकरी लावतो असे सांगून, त्यांच्याकडून एकूण २८ लाख रुपये घेऊन, त्यांना नोकरी न लावता त्यांची फसवणूक केली असल्याची फिर्याद शंकर किसन बोंद्रे यांनी दिली आहे. गुन्ह्याचा अधिक तपास सपोनी शिंदे हे करीत आहेत.