भ्रमात राहुन स्वतः आणि कुटुंबाबरोबर गावाला कोरोनाच्या खाईत लोटू नका - श्रीमंत रामराजे नाईक निंबाळकर

कोरोना केअर सेंटर उदघाटन प्रसंगी बोलताना श्रीमंत रामराजे नाईक निंबाळकर  (छाया - योगायोग फोटो)

 Inauguration of Corona Care Center, of Agricultural Produce Market Committee, Phaltan

   कृषी उत्पन्न बाजार समिती फलटणच्या कोरोना केअर सेंटरचे उदघाटन

    फलटण  : लक्षणे दिसताच चाचणी करुन घ्या, पॉझिटीव्ह आलात तर लगेच विलगीकरण कक्षात दाखल व्हा, अधिक त्रास असेल तर रुग्णालयात जा, मात्र कोणत्याही परिस्थितीत मला काही होणार नाही या भ्रमात राहुन स्वतः आणि कुटुंबाबरोबर गावाला कोरोनाच्या खाईत लोटू नका असा  इशारा महाराष्ट्र विधान परिषद सभापती श्रीमंत रामराजे नाईक निंबाळकर यांनी दिला आहे.

   कृषी उत्पन्न बाजार समिती फलटणच्या माध्यमातून ढवळपाटी, वाखरी ता. फलटण (जलनायक श्रीमंत रामराजे नगर) येथील उप बाजार आवारातील कृषी लक्ष्मी मंगल कार्यालयात सुरु करण्यात आलेल्या कोरोना विलगीकरण कक्षाचे उदघाटन समारंभात मार्गदर्शन करताना श्रीमंत रामराजे नाईक निंबाळकर बोलत होते, अध्यक्षस्थानी आ. दिपकराव चव्हाण होते, बाजार समितीचे सभापती श्रीमंत रघुनाथराजे नाईक निंबाळकर, उपसभापती भगवानराव होळकर, बाजार समिती संचालक, पंचायत समिती सदस्य श्रीमंत विश्वजीतराजे नाईक निंबाळकर, गोविंदचे संचालक श्रीमंत सत्त्यजितराजे नाईक निंबाळकर, प्रांताधिकारी डॉ. शिवाजीराव जगताप, तहसीलदार समीर यादव, बाजार समितीचे सचिव शंकरराव सोनवलकर आदी मान्यवर उपस्थित होते

कोरोना केअर सेंटरचे उदघाटन करताना श्रीमंत रामराजे नाईक निंबाळकर समवेत आ. दिपकराव चव्हाण, बाजार समितीचे सभापती श्रीमंत रघुनाथराजे नाईक निंबाळकर, श्रीमंत विश्वजीतराजे नाईक निंबाळकर

      कोरोना मधून सहिसलामत बाहेर पडायचे असेल, आपली व आपल्या कुटुंबाच्या आरोग्याची काळजी असेल तर शासन, प्रशासन, ग्रामदक्षता समिती यांच्या सूचनांचे पालन करावे लागेल, आता घरात नव्हे, गावातील अथवा लगतच्या विलगीकरण कक्षात दाखल व्हा तेथे सर्व सुविधा आणि वैद्यकीय सुविधा उपलब्ध आहेत, गरज असेल तर तेथूनच रुग्णालयात दाखल केले जाईल आवश्यक त्या सर्व वैद्यकीय उपचाराची व्यवस्था, गरजेनुसार औषधे इंजेक्शन्स उपलब्ध करुन देण्यात शासन प्रशासन आणि आम्ही कोठेही कमी पडणार नाही, मात्र तुम्ही पॉझिटीव्ह असूनही घरातच राहिलात तर कठीण प्रसंग उदभवेल, त्यातून संपूर्ण कुटुंब, गाव, तालुका मोठ्या संकटात सापडण्याचा धोका लक्षात घेऊन वेळीच चाचणी करुन घ्या, पॉझिटीव्ह आलात तर लगेच उपचार घ्या असे आवाहन श्रीमंत रामराजे नाईक निंबाळकर यांनी केले आहे.

ढवळपाटी, वाखरी ता. फलटण येथे सुरु करण्यात आलेल्या कोरोना केअर सेंटर

       फलटण तालुक्यात प्रत्येक जिल्हा परिषद मतदार संघात एक याप्रमाणे कोरोना उपचार व विलगीकरण कक्ष सुरु केले आहेत, फलटण येथे उप जिल्हा रुग्णालय व कोरोना उपचार केंद्र सुरु केली आहेत, गरज वाटल्यास सातारा, कराड, पुणे येथे पाठवून उपचार करण्याची व्यवस्था करण्यात आल्याचे निदर्शनास आणून देत चाचणी (टेस्ट) करुन घ्या, बाधीत असाल तर लगेच उपचार असे पुन्हा पुन्हा आवाहन करीत नव्याने आलेला म्युकर मायकोसिस आणखी घातक आहे, त्याच्या उपचाराची व्यवस्था करण्यात येत असल्याची ग्वाही श्रीमंत रामराजे नाईक निंबाळकर यांनी दिली.

      निंबळक सारख्या छोट्या गावात मोठ्या संख्येने लोक बाधीत आढळून आल्याने गंभीर परिस्थिती निर्माण झाली ती केवळ लोकांनी सूचना पाळल्या नाहीत, ग्रामदक्षता समिती, आशा वर्कर, प्रशासनाच्या सुचनाकडे दुर्लक्ष केल्याने ही परिस्थिती ओढवल्याचे स्पष्ट करीत अशी परिस्थिती उदभवणार नाही यासाठी प्रत्येकाने काळजी घ्या, उपचाराच्या सुविधा व व्यवस्थेसाठी आम्ही व शासन, प्रशासन खंबीर असल्याची ग्वाही श्रीमंत रामराजे नाईक निंबाळकर यांनी दिली.

      कोरोनाच्या पार्श्वभूमीवर बाजार समितीने विविध सेवा, सुविधा उपलब्ध करुन दिल्या आहेत, आपण स्वतः संपूर्ण तालुक्याचा दौरा करुन लोकांना वैद्यकीय सेवा उपलब्ध करुन दिल्या त्यापलीकडे जाऊन या तालुक्यात शेतकरी व सर्वसामान्य माणूस वैद्यकीय सेवा सुविधांपासून वंचित राहु नये म्हणून महाराजा मालोजीराव मल्टीस्पेशालिटी रुग्णालयाची उभारणी बाजार समितीच्या आवारात करण्यात येत असून लवकरच दर्जेदार वैद्यकीय सेवेचे दालन फलटण करांच्या सेवेत दाखल होत असल्याचे बाजार समितीचे सभापती श्रीमंत रघुनाथराजे नाईक निंबाळकर यांनी निदर्शनास आणून दिले.

कोरोना केअर सेंटर उदघाटन प्रसंगी बोलताना श्रीमंत रघुनाथराजे नाईक निंबाळकर 

      बाजार समितीचे २ संचालक व तालुक्यातील अनेकांचे अकस्मात झालेले निधन आम्हाला कोरोनाची धास्ती वाढविणारे ठरल्याने बाजार समितीने हे विलगीकरण केंद्र सुरु केले असून येथे व्हेंटीलेटर्स, ऑक्सिजन व जनरल बेडची व्यवस्था तसेच डॉक्टर्स व अन्य वैद्यकीय कर्मचारी, औषधे उपलब्ध करुन देऊन एक उत्तम कक्ष उभारला आहे, परिसरातील ग्रामस्थांनी त्याचा लाभ घ्यावा असे आवाहन श्रीमंत रघुनाथराजे नाईक निंबाळकर यांनी केले.

  कार्यक्रमास तालुका आरोग्य अधिकारी डॉ. विक्रम पोटे, हिंदकेसरी पै.  बापूराव लोखंडे, माजी सभापती मोहनराव लोखंडे व रामभाऊ ढेकळे, ढवळ सरपंच अंकुश लोखंडे, आप्पा  लोखंडे, शंकर लोखंडे, तरडफ माजी सरपंच रवी पिसाळ,  पिराचीवाडी सरपंच दीपक सावंत, रणजित तांबे, अधिकराव ढेकळे, अशोकराव निंबाळकर, नंदू भाऊ नाळे, आशा वर्कर्स, बिबी आरोग्य केंद स्टाफ, मार्केट कमिटी स्टाफ यांच्या सह ग्रामस्थ उपस्थित होते.

    प्रारंभी उपसभापती भगवानराव होळकर यांनी सर्वांचे स्वागत व मान्यवरांचा सत्कार केल्यानंतर फित कापून विलगीकरण कक्षाचे उदघाटन करण्यात आले, सचिव शंकरराव सोनवलकर यांनी समारोप व आभार मानले. प्रा. नवनाथ लोखंडे यांनी सूत्र संचालन केले.