रणजितसिंह नाईक निंबाळकर यांची सातारा जिल्हा बँकेच्या संचालकपदी बिनविरोध निवड; कार्यकर्त्यांचा जल्लोष

Ranjitsinh Naik Nimbalkar elected unopposed as director of Satara District Bank; Workers celebrate

    फलटण (गंधवार्ता वृत्तसेवा) दि. २१: माजी खासदार रणजितसिंह नाईक निंबाळकर यांची सातारा जिल्हा मध्यवर्ती सहकारी बँकेच्या संचालकपदी बिनविरोध निवड झाली आहे. या निवडीनंतर त्यांनी मुख्यमंत्री देवेंद्र फडणवीस यांच्यासह या निवड प्रक्रियेत महत्त्वाची भूमिका बजावणाऱ्या मंत्री व आमदारांचे आभार मानले. त्यांच्या निवडीचे वृत्त समजताच कार्यकर्त्यांनी विविध ठिकाणी जल्लोष करत आनंद व्यक्त केला असून, त्यांच्यावर अभिनंदनाचा वर्षाव होत आहे.

    या निवडीनंतर प्रतिक्रिया व्यक्त करताना रणजितसिंह नाईक निंबाळकर यांनी निवडणूक प्रक्रिया कोणत्याही अंतर्गत पक्षीय वादाशिवाय पार पडल्याचे स्पष्ट केले. ही निवड बिनविरोध होण्यासाठी सहकार्य केल्याबद्दल त्यांनी महाराष्ट्राचे मुख्यमंत्री देवेंद्र फडणवीस यांचे विशेष आभार मानले.

    तसेच, ग्रामविकास मंत्री जयकुमार गोरे आणि आमदार शिवेंद्रराजे भोसले यांनी या निवड प्रक्रियेत अत्यंत महत्त्वाची भूमिका बजावल्याचे त्यांनी नमूद केले. याशिवाय मंत्री मकरंद पाटील आणि मंत्री शंभूराज देसाई यांचेही त्यांनी मनःपूर्वक आभार मानले.

    रणजितसिंह नाईक निंबाळकर यांच्या सातारा जिल्हा मध्यवर्ती सहकारी बँकेच्या संचालकपदी झालेल्या बिनविरोध निवडीमुळे त्यांच्या समर्थकांमध्ये उत्साहाचे वातावरण आहे. विविध ठिकाणी कार्यकर्त्यांनी आनंदोत्सव साजरा करत त्यांचे अभिनंदन केले.