अनिकेत देशमुखांची माघार, धैर्यशील मोहिते पाटलांना पाठिंबा

Aniket Deshmukh's withdrawal, support for courageous Mohite Patil

   फलटण (गंधवार्ता वृतसेवा) दि.१९ -  महाविकास आघाडीने आपल्यावर अन्याय केला. त्यामुळे माढा लोकसभा मतदारसंघातून अपक्ष निवडणूक लढविण्याची घोषणा करणारे शेकापचे युवा नेते डॉ. अनिकेत देशमुख शुक्रवारी अपक्ष उमेदवारी अर्ज दाखल करणार होते. मात्र राष्ट्रवादीचे ज्येष्ठ नेते शरद पवार यांच्या भेटीनंतर डॉ. अनिकेत देशमुख यांनी आपले बंड मागे घेतले आहे. सोलापूर जिल्ह्यातील वरिष्ठ नेत्यांनी दिलेला सल्लाही देशमुखांनी मान्य केल्याचे दिसते. माढ्यात धैर्यशील मोहिते पाटील हे उत्तम जानकर यांच्यानंतर दिवंगत नेते गणपतराव देशमुख यांचे नातू डॉ. अनिकेत देशमुख यांनाही आपल्यासोबत कायम ठेवण्यात यश मिळविले आहे.

    देशभरात होत असलेल्या लोकसभा निवडणुकीत पश्चिम महाराष्ट्रात माढा मतदारसंघ सर्वाधिक चर्चेत राहिला आहे. धैर्यशील मोहिते पाटील यांना उमेदवारी नाकारल्यानंतर भाजपला जय श्रीराम करत शरद पवार यांच्या राष्ट्रवादी काँग्रेसमध्ये प्रवेश करून तुतारी हातात घेतली. माढ्यात मास्टरस्ट्रोक मारण्याचा प्रयत्न देवेंद्र फडणवीस यांनी केला होता. माळशिरस विधानसभा मतदारसंघातील उत्तम जानकर यांना देवेंद्र फडणवीस यांनी भेटीचे निमंत्रण दिले. फडणवीसांच्या भेटीनंतर जानकर हे धैर्यशील मोहिते पाटील यांच्यासह पवारांना भेटले. उत्तम जानकर यांचा विषय संपलेला नसताना महाविकास आघाडीतील घटक पक्ष असलेल्या शेकापने माढा लोकसभा मतदारसंघातून निवडणूक लढविण्याची घोषणा केली. त्यांच्या घोषणेने सोलापूरमध्ये एकच खळबळ उडाली होती.

    महाविकास आघाडी आपल्याला गृहीत धरत नाही. आपण अपक्ष उमेदवारी अर्ज दाखल करणार, असे पत्रकार परिषद घेत डॉ. अनिकेत देशमुख यांनी जाहीर केले होते. पत्रकार परिषद सुरू असताना डॉ. अनिकेत देशमुख यांना शरद पवारांचा फोन आला. बारामतीला बोलावून घेतले. बारामती येथे धैर्यशील मोहिते पाटील आणि डॉ अनिकेत देशमुख यांची भेट झाली. सोलापूर जिल्ह्यातील काही वरिष्ठ नेत्यांनी तातडीने सूत्रे हलविले. प्रत्यक्ष डॉ. अनिकेत यांच्याशी संपर्क साधण्यात आला. वरिष्ठांनी दिलेला सल्ला आणि पवारांच्या भेटीनंतर डॉ. अनिकेत यांनी माढ्यातून निवडणूक लढविण्याची केलेली घोषणा मागे घेतली. तसेच, महाविकास आघाडीसोबत राहणार असल्याचे स्पष्ट केले. आमच्या संस्थेचे काही विषय होते. तसेच माढा लोकसभा मतदारसंघात यापुढील काळात आम्हाला विश्वासात घेण्यात येईल, असे आश्वास दिल्याचे डॉ. अनिकेत देशमुख यांनी पवारांच्या भेटीनंतर सांगितले.