उपमुख्यमंत्री देवेंद्र फडणवीस यांच्या हस्ते फलटण मध्ये विविध विकास कामांचे भूमिपूजन

Bhoomipujan of various development works in Phaltan by Deputy Chief Minister Devendra Fadnavis

    कै. हिंदुरावजी यांनी पाहिलेले स्वप्न  सत्यात ; तालुक्याची स्वप्नपूर्ती व माझी वचनपूर्ती- खा.रणजितसिंह

    फलटण (गंधवार्ता वृत्तसेवा) दि.१६ - फलटण तालुक्याच्या व माढा लोकसभा मतदारसंघाच्या इतिहासामधला आजचा दिवस हा सुवर्ण अक्षरात लिहावा असा आहे. माजी खासदार कै. हिंदुराव नाईक निंबाळकर यांनी पाहिलेले स्वप्न  सत्यात उतरत आहे. तसेच मी लोकसभा निवडणुकीत दिलेल्या शब्दांची पूर्तता होत आहे. आज  बुधवार दिनांक १७ जानेवारी २०२४ रोजी निरा देवघर उजवा मुख्य कालवा किमी ६६ ते ८७ मधील बंदिस्त नलिका कालवा आणि निरा देवघर प्रकल्पामधून ०.९३ टी. एम.सी. पाणी धोम बलकवडी प्रकल्पामध्ये टाकणे या कामांचा शुभारंभ व भूमिपूजन, फलटण - बारामती रेल्वेमार्ग, नाईकबोमवाडी एमआयडीसी जमीन हस्तांतरण अश्या विविध विकासकामांचे भूमिपूजन उपमुख्यमंत्री देवेंद्र फडणवीस यांच्या शुभहस्ते महसूल मंत्री राधाकृष्ण विखे पाटील, पालकमंत्री शंभूराज देसाई यांच्या प्रमुख उपस्थितीत संपन्न होत आहे. याप्रसंगी  सातारा व सोलापूर जिल्ह्यातील सर्व खासदार व आजी माजी आमदार, मान्यवर उपस्थित राहणार आहेत.  आज फलटण तालुक्याची स्वप्नपूर्ती व लोकसभा निवडणुकीच्या वेळेस मी दिलेल्या शब्दांची वचनपूर्ती होत आहे याचा मला मनस्वी आनंद होत असल्याचे सांगतानाच केंद्रीय मंत्री तसेच मुख्यमंत्री एकनाथराव शिंदे, उपमुख्यमंत्री देवेंद्र फडणवीस, उपमुख्यमंत्री अजितदादा पवार यांचे आभार खासदार रणजितसिंह नाईक निंबाळकर यांनी मानले.

    फलटण येथे घेतलेल्या पत्रकार परिषदेमध्ये खासदार रणजितसिंह नाईक निंबाळकर बोलत होते. या प्रसंगी भाजपाचे जिल्हा सरचिटणीस जयकुमार शिंदे, युवनेते अभिजित नाईक निंबाळकर, फलटण कोरेगाव विधानसभा मतदारसंघाचे प्रमुख सचिन कांबळे, माजी नगरसेवक अशोकराव जाधव, सचिन अहिवळे उपस्थित होते.

    पुढे बोलताना खासदार रणजितसिंह नाईक निंबाळकर म्हणाले, माजी खासदार कै. हिंदुराव नाईक निंबाळकर यांनी पाहिलेले स्वप्न  आता सत्यात उतरत आहे. निरा-देवघर साठी त्यांनी केलेला संघर्ष, फलटण बारामती रेल्वेसाठी केलेला संघर्ष त्यांच्या मृत्यूनंतर पूर्ण होत आहे. कै. हिंदुरावजी यांची इच्छा उपमुख्यमंत्री देवेंद्र फडणवीस यांनी पूर्ण केली आहे. धोम बलकवडी कालव्याचे तीन ते चार महिने मिळणारे पाणी आता उपमुख्यमंत्री देवेंद्र फडणवीस यांच्या प्रयत्नामुळे बारमाही मिळणार आहे. धोम - बलकवडी कालवा जोड प्रकल्पाला तसेच निरा - देवघर प्रकल्पाला, फलटण - बारामती रेल्वेमार्ग प्रकल्पासाठी आर्थिक तरतूद करण्यात आलेली आहे. त्याचबरोबर पूर्व भागातील लोकांना रोजगार मिळण्यासाठी नाईकबोमवाडी येथे एमआयडीसीची स्थापना होत असून त्याचे भूमिपूजन आज १७ जानेवारी रोजी होत आहे. लवकरच नाईकबोमवाडी एमआयडीसी येथे वाहनांचा प्रकल्प सुरू होणार आहे.  फलटण तालुक्याची स्वप्नपूर्ती व लोकसभा निवडणुकीच्या वेळेस मी दिलेल्या शब्दांची वचनपूर्ती होत आहे याचा मला मनस्वी आनंद होत असल्याचे खासदार रणजीतसिंह नाईक निंबाळकर यांनी स्पष्ट करून, दिनांक १७ जानेवारी रोजी यशवंतराव चव्हाण हायस्कूल फलटण येथे होणाऱ्या कार्यक्रमासाठी नागरिकांनी उपस्थित राहण्याचे आवाहन केले.