हिंगणगाव येथेही रेमडिसिव्हीर इंजेक्शनची ब्लॅक ने झाली होती विक्री
गंधवार्ता वृत्तसेवा फलटण दि. १२ मे २०२१ - रेमडिसिव्हीर इंजेक्शन काळाबाजार प्रकरणी अटकेत असलेल्या टोळीकडून, फलटण तालुक्यात या अगोदरही इंजेक्शनची विक्री केली गेल्याचे समोर आले आहे. फलटण तालुक्यातील हिंगणगाव येथे काही इंजेक्शन विकली होती, त्यातील दोन इंजेक्शन सध्या पोलिसांकडे जमा आहेत. त्या अनुषंगाने पोलिसांचा तपास चालू आहे.
फलटण शहर पोलीसांनी वृत्तपत्रामध्ये सदर गुन्हयाच्या तपास कामी, कोणाची काही तक्रार असल्यास संपर्क करावा त्याचे नांव गुप्त ठेवण्यात येईल असे आवाहन केले होते. केलेल्या आवाहनानुसार हिंगणगांव ता. फलटण जि. सातारा येथील एक साक्षीदार यांनी गुन्हयात अटक केलेल्या आरोपीतांकडून स्वतःचे नातेवाईक कोरोनाग्रस्त व उपचार घेत असताना मोठया किंमतीने रेमडिसिव्हीर इंजेक्शन खरेदी केली होती. परंतु संबंधित रुग्णाचे उपचारादरम्यान निधन झाल्याने, शिल्लक राहिलेल्या रेमडिसिव्हीर इंजेक्शनच्या Remdesivir Injection दोन बॉटल (व्हायल) हया तपासकामी त्यांनी फलटण शहर पोलीस ठाण्यात हजर केलेल्या आहेत.
रेमडिसिव्हीर इंजेक्शनचा काळा बाजार करून त्याची विक्री केली जात असल्याची माहिती फलटण पोलिसांना मिळाल्यानंतर, पोलिसांनी तातडीने सापळा रचून संबंधित १) सुविधा हॉस्पिटलचा कंपाउंडर सुनिल विजय कचरे वय ३८ वर्षे २) अजय सुरेश फडतरे वय ३४ व्यवसाय शेती रा. पिंप्रद ता. फलटण जि. सातारा ३) प्रविण दिलीप सापते वय ३६ रा घाडगेवाडी ता. फलटण जि सातारा ४) आरोपी नामे निखिल अनिल घाडगे वय ३१ वर्षे रा अनपटवाडी ता खटाव जि सातारा यांना गुन्हयाचे कामी अटक करून त्यांच्याकडे अधिक चौकशी करता चौकशी मध्ये आरोपी ५) अमीत विजय कुलकर्णी वय ४५ रा ७० बी /३ आदर्श कॉलनी गोडोली सातारा ६) रविंद्र रामचंद्र लाहोटी वय ३२ रा तारळे ता. पाटण जि सातारा ७) मानसी मेडीकल तारळे चे मालक अरूण शामराव जाधव यांना अटक करण्यात आलेली असून सद्या पोलीस कस्टडी रिमांड मध्ये आहेत.
सदर गुन्हयाचा अधिक तपास श्री. अजय कुमार बंसल पोलीस अधिक्षक सातारा, श्री. धिरज पाटील अपर पोलीस अधिक्षक सातारा, श्री. तानाजी बरडे सो उपविभागीय पोलीस अधिकारी फलटण विभाग फलटण यांचे मार्गदर्शनाखाली श्री भारत किंद्रे पोलीस निरीक्षक, श्री. एस. के. राऊळ सहाय्यक पोलीस निरीक्षक फलटण शहर व पथक हे करीत आहेत.
No comments