जात प्रमाणपत्र पडताळणीतील त्रुटींची तातडीने पूर्तता करण्याचे आवाहन
पुणे, दि. २८: जात वैधता प्रमाणपत्राअभावी मागासवर्गीय विद्यार्थी व्यावसायिक अभ्यासक्रमाच्या प्रवेशापासून वंचित राहू नयेत, यासाठी ज्या अर्जदार/विद्यार्थ्यांनी अद्यापही वैधता प्रमाणपत्रातील त्रुटींची पूर्तता केलेली नाही, त्यांनी संबंधित जिल्हा जात प्रमाणपत्र पडताळणी समितीशी त्वरित संपर्क साधावा, तसेच त्रुटींची पूर्तता करावी, असे आवाहन डॉ. बाबासाहेब आंबेडकर संशोधन व प्रशिक्षण संस्थेच्या (बार्टी), महासंचालक तथा राज्यातील सर्व जिल्हा जात प्रमाणपत्र पडताळणी समित्यांच्या मुख्य समन्वयक, श्रीमती दीपा मुधोळ-मुंडे यांनी केले आहे.
शैक्षणिक वर्ष २०२६-२७ मधील राज्य सामाईक प्रवेश परीक्षा कक्षाकडून उच्च शिक्षण, तंत्रशिक्षण, कृषी शिक्षण, वैद्यकीय/आयुष शिक्षण आणि कला शिक्षण विभागाच्या विविध पदवी व पदव्युत्तर अभ्यासक्रमांमध्ये राखीव प्रवर्गातून प्रवेशासाठी केंद्रभूत प्रवेश प्रक्रिया राबवण्यात येत आहे.
अभ्यासक्रम प्रवेशाच्या तारखा राज्य सामाईक प्रवेश परीक्षा कक्षाकडून जाहीर करण्यात आलेल्या आहेत. तरीही, समित्यांकडे अनेक विद्यार्थ्यांनी उशिराने अर्ज सादर केल्याचे दिसून आले आहे.
व्यावसायिक अभ्यासक्रमासाठी पात्र विद्यार्थ्यांना त्रुटींची पूर्तता करण्याबाबत एसएमएस, ईमेल व पत्राद्वारे संबंधित समित्यांमार्फत कळवण्यात आले असतानाही, अनेक अर्जदार/विद्यार्थ्यांनी संबंधित समितीशी संपर्क साधलेला नसल्याचे निदर्शनास आले आहे. त्रुटींची पूर्तता करण्याची सर्वस्वी जबाबदारी अर्जदारांचीच आहे.
अर्जदारांची गैरसोय होऊ नये यासाठी, आवश्यकतेनुसार जिल्हा जात प्रमाणपत्र पडताळणी समित्यांनी सुट्टीच्या दिवशीही कार्यालय सुरू ठेवावे, असे निर्देश महासंचालक, बार्टी तथा मुख्य समन्वयक, जिल्हा जात प्रमाणपत्र पडताळणी समित्या यांना देण्यात आले आहेत.
No comments