उपमुख्यमंत्री एकनाथ शिंदे यांच्या उपस्थितीत राजे गटाचा शिवसेनेत प्रवेश

Raje group joins Shiv Sena in the presence of Deputy Chief Minister Eknath Shinde

    फलटण (गंधवार्ता वृत्तसेवा) दि.२८ – फलटण नगरपरिषद निवडणुकीच्या पार्श्वभूमीवर शिवसेना व मित्र पक्षाच्या उमेदवारांच्या प्रचारार्थ उपमुख्यमंत्री एकनाथ शिंदे यांच्या जाहीर सभेला प्रचंड उत्साहात प्रतिसाद मिळाला. या सभेत राजे गटाचा जाहीर प्रवेशही पार पडला. उपमुख्यमंत्री शिंदे यांच्या स्वागताला विधान परिषदेचे माजी सभापती श्रीमंत रामराजे नाईक निंबाळकर हे देखील उपस्थित होते त्याचबरोबर पालकमंत्री शंभूराज देसाई, आमदार महेश शिंदे यांच्यासह अनेक मान्यवर उपस्थित होते.

    या कार्यक्रमात माजी जिल्हा परिषद अध्यक्ष संजीवराजे नाईक निंबाळकर, कृषी उत्पन्न बाजार समितीचे चेअरमन रघुनाथराजे नाईक निंबाळकर, माजी नगरसेविका श्रीमंत सुभद्राराजे नाईक निंबाळकर, माजी जिल्हा परिषद सदस्य श्रीमंत शिवांजलीराजे नाईक निंबाळकर, माजी पंचायत समिती सभापती विश्वजीत नाईक निंबाळकर यांच्यासह नगराध्यक्ष पदाचे उमेदवार श्रीमंत अनिकेतराजे नाईक निंबाळकर नगरसेवक पदाचे सर्व उमेदवार आणि हजारो कार्यकर्त्यांनी उपमुख्यमंत्री एकनाथ शिंदे यांच्या उपस्थितीत शिवसेना पक्षात जाहीर प्रवेश केला.

    फलटण एमआयडीसी विस्ताराची मागणी रामराजे नाईक निंबाळकर यांनी केल्यानंतर उपमुख्यमंत्री एकनाथ शिंदे यांनी सभा चालू असतानाच तात्काळ उद्योगमंत्री उदय सामंत यांना फोन करून बैठक घेण्याचे निर्देश दिले.

    त्याचप्रमाणे फलटणच्या ५० बेडच्या उपजिल्हा रुग्णालयाचे १०० बेडमध्ये रूपांतर करण्याच्या रामराजेंनी केलेल्या मागणीवरही उपमुख्यमंत्र्यांनी आरोग्यमंत्री आबिटकर यांच्याशी थेट संवाद साधून तातडीने पालकमंत्री शंभूराजे साहेब व रामराजे नाईक निंबाळकर त्यांच्यासह बैठक घेऊन रुग्णालयाचे रूपांतर  करण्यासंबंधीचे आदेश दिले.

    फलटण शहरातील झोपडपट्टी पुनर्वसन करून नागरिकांना पक्की घरे देण्याची ग्वाही शिंदेंनी दिली. त्याचबरोबर बाणगंगा नदी सुशोभीकरण आणि शहर तटबंदी सुशोभीकरणाच्या कामांची जबाबदारीही त्यांनी घेतली.
"फलटणला दहशतमुक्त करू, मी करेक्ट कार्यक्रम करतो," असा ठाम संदेश देत उपमुख्यमंत्र्यांनी लाडकी बहीण योजना कधीही बंद होणार नसल्याचे स्पष्ट केले.

    डॉक्टर महिला आत्महत्या प्रकरणावर बोलताना उपमुख्यमंत्री शिंदे म्हणाले की, “या प्रकरणात दोषी आढळणाऱ्यांवर कठोर कारवाई होईल. कोणालाही सोडले जाणार नाही.”

    सभास्थळी शिवसेना व मित्र पक्षाच्या कार्यकर्त्यांचा उत्स्फूर्त प्रतिसाद पाहायला मिळाला असून या प्रवेशाने निवडणुकीत नव्या समीकरणांना सुरुवात झाल्याचे राजकीय वर्तुळात बोलले जात आहे.

श्रीमंत रामराजे नाईक-निंबाळकर यांच्याबद्दल बोलताना शिंदे म्हणाले, “रामराजे हे प्रगल्भ नेते आहेत. ते निर्णय घेताना स्वतःचा विचार करत नाहीत, तर फलटणला काय मिळेल याचा विचार करतात. फलटणचा सर्वांगीण विकास करण्याची जबाबदारी आम्ही पूर्ण ताकदीने पार पाडू.”