साखरवाडीत बनावट लॅब रिपोर्ट प्रकरण ; डॉक्टरवर गुन्हा दाखल ; लॅबचालकास अटक
फलटण (गंधवार्ता वृत्तसेवा) दि.१३ सप्टेंबर२०२५ - फलटण तालुक्यातील साखरवाडी येथे बनावट लॅब रिपोर्ट तयार करणाऱ्या टोळीविरुद्ध फलटण ग्रामीण पोलिसांनी गुन्हा दाखल करून एकाला अटक केली आहे.
दि. १० सप्टेंबर २०२५ रोजी डॉ. ब्रम्हानंद रामराव टाळे (वय ५२, रा. बोबडे कॉलनी, शंकरनगर, खामगाव, जि. बुलढाणा) यांनी दिलेल्या तक्रारीवरून फलटण ग्रामीण पोलीस स्टेशनमध्ये गु.रजि.नं. ६४३/२०२५ भादंविस कलम ४२०, ४६५, ४६८, ४७१, ३४ व भारतीय वैद्यकीय अधिनियम १९६१ चे कलम ३३ प्रमाणे गुन्हा दाखल करण्यात आला आहे.
तक्रारीनुसार, साखरवाडी येथील धन्वंतरी लॅबोरेटरीमध्ये लॅबचालक विशाल नाळे (रा. वाठार निंबाळकर, ता. फलटण), डॉ. बाळासाहेब राऊत (रा. साखरवाडी) व इतर दोन आरोपींनी रक्त, मूत्र आदी नमुन्यांचे चाचणी अहवाल तयार करून ते प्रमाणित केले असल्याचे दाखवले. परंतु सदर व्यक्तींना पॅथोलॉजी विषयातील पदव्युत्तर शिक्षण किंवा वैद्यकीय परवाना नसताना हा अवैध व्यवसाय सुरु होता. त्यातच डॉ. टाळे यांच्या सहीचा दुरुपयोग करून बनावट रिपोर्ट तयार केले जात होते. हे रिपोर्ट पॅथोलॉजिस्टकडून प्रमाणित असल्याचे भासवून रुग्ण, डॉक्टर तसेच विमा कंपन्यांची फसवणूक करण्यात येत होती.
या प्रकरणात लॅबचालक विशाल नाळे यास पोलिसांनी अटक केली असून इतर आरोपींच्या अटकेसाठी पोलिसांची पुढील कारवाई सुरू आहे.
ही कारवाई मा. पोलीस अधीक्षक श्री. तुषार दोषी, अप्पर पोलीस अधीक्षक वैशाली कडूकर व उपविभागीय पोलीस अधिकारी खांबे यांच्या मार्गदर्शनाखाली पोलीस निरीक्षक सुनिल महाडीक यांच्या नेतृत्वाखाली करण्यात आली. तपास पथकात पो.उ.नि. दिपक पवार, पो.हवा. महादेव पिसे, अमोल पवार, पो.कॉ. अमोल देशमुख, गणेश ठोंबरे, मारूती रंगवाड यांनी सहभाग घेतला. या गुन्ह्याचा तपास पो.उ.नि. दिपक पवार करीत आहेत.
No comments