फलटण बस स्थानक अद्यावत होणार - आ. सचिन पाटील

Phaltan bus station will be upgraded - MLA Sachin Patil

    फलटण (गंधवार्ता वृत्तसेवा) दि.20 - फलटण शहर हे वाढत्या लोकसंख्येचे शहर म्हणून नावारूपास  येत आहे. तसेच पंढरपूर  पालखी महामार्गावरील मध्यवर्ती शहर म्हणून फलटणची ओळख निर्माण झाली आहे .या सर्व बाबींचा विचार करता, फलटणमध्ये नवीन अद्यावत बस स्थानक होणे गरजेचे आहे. या बस स्थानकावरून प्रवाशांची वाढती संख्या पाहता, बस स्थानकावर सोयी सुविधा व  अद्यावत बस स्थानक निर्माण करणे गरजेचे आहे. यासाठी मी व मा.खासदार रणजितसिह नाईक निंबाळकर यांनी महाराष्ट्राचे मुख्यमंत्री देवेंद्र फडणवीस व राज्याचे उपमुख्यमंत्री अजितदादा पवार यांच्याकडे सातत्याने पाठपुरावा केल्याने, शासनाने निर्णय  झाला व महाराष्ट्र राज्य परिवहन महामंडळाच्या विविध जागावर सार्वजनिक खाजगी सहभाग (PPP) या तत्वावर प्रकल्प राबविण्याकरिता तज्ञ  प्रकल्प व्यवस्थापन सल्लागाराच्या पटलावर मुख्यमंत्री महाराष्ट्र राज्य तथा अध्यक्ष महाराष्ट्र राज्य परिवहन महामंडळ यांनी यास मंजुरी दिली आहे. त्यामुळे लवकरच फलटण बस स्थानकाला मोठ्या प्रमाणामध्ये निधी उपलब्ध होणार असल्याचे आमदार सचिन पाटील यांनी सांगितले आहे.

    फलटणला अद्यावत बस स्थानक उभा राहील, त्याचबरोबर अद्यावत व्यापारी संकुल उभारले जाणार आहे, त्यामुळे त्या परिसरातील येणाऱ्या सर्व प्रवाशांना  सुविधा उपलब्ध होतील, तसेच नागरिकांनाही त्याचा फायदा होईल.  बऱ्याच वर्षापासून फलटण तालुक्यातील जनतेची मागणी होती ती लवकरच पूर्ण होणार असल्यामुळे आमदार सचिन पाटील यांनी राज्य सरकारचे आभार व्यक्त केले आहे.